ភ្នំពេញ៖ គិតត្រឹមរយៈពេល ២ខែឆ្នាំនេះ គឺខែមករា និងខែកុម្ភៈ ទំហំពាណិជ្ជកម្មរវាងកម្ពុជា និងអន្តរជាតិសម្រេចបានជាង ៦.៨ពាន់លានដុល្លារ គឺថយចុះបើធៀបនឹងរយៈពេលដូចគ្នានឹងឆ្នាំ២០២២។
បើតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ការនាំចេញផលិតផលកម្ពុជាទៅទីផ្សារអន្តរជាតិរយៈពេល ២ខែឆ្នាំនេះ គឺសម្រេចបានជាង ៣,២ពាន់លានដុល្លារ ថយចុះ ៨,៨ភាគរយ បើធៀបនឹង២ ខែឆ្នាំ២០២២។ ចំណែកការនាំផលិតផលពីអន្តរជាតិមកកម្ពុជា គឺសម្រេចបាន ៣,៥ពាន់លានដុល្លារ គឺថយចុះ ៣០,៩ភាគរយ។
កម្ពុជាបាននាំចេញផលិតផលទៅប្រទេសអាមេរិកច្រើនជាងគេ គឺសម្រេចបាន ១,១ពាន់លានដុល្លារ ថយចុះ ២០,២ភាគរយ ហើយការនាំចេញផលិតផលរបស់អាមេរិកមកកម្ពុជាក៏ថយចុះផងដែរ គឺ២៤,៥ភាគរយ ដែលសម្រេចបានតែជិត ៤០លានដុល្លារ។
សម្រាប់ការនាំចេញទៅប្រទេសចិនវិញ គឺសម្រេចបាន ១៩៨លានដុល្លារ គឺថយចុះ ៥,៥ភាគរយ ហើយការនាំចូលមកកម្ពុជាគឺសម្រេចបាន ១,៥ពាន់លានដុល្លារ គឺថយចុះ ១៦,២ភាគរយ៕
